De lata mula China sinusuri na

Sinimulan na ng National Meet Inspection Service (NMIS) ang pag­ pa­pasuri ng mga canned meat products na mula China na nasa pamilihan bunga na rin ng posibleng kontami­nasyon nito sa mela­mine.   

Ayon kay Atty. Jane Bacayo, officer-in-charge ng NMIS, ilang mga piba­dong laboratoryo ang nag­sasagawa na ng pagsu­suri sa mga  pro­duktong luncheon meat ng Shanghai Food Products na Ma-ling at Cofco Food Ltd., upang mala­man kung positibo ito sa kemikal na melamine.

Inaasahang mailala­bas naman ang resulta ng pagsusuri sa susunod na linggo.

Bukod sa dalawang brand ng luncheon meat na may importation  do­cuments, susuriin na rin ng private laboratory ang mga walang label na meat products galing China na nasa pamilihan.

Inamin ni Bacayo na walang sapat na pasili­dad sa pagsusuri ng melamine ang NMIS kaya ipinasya na lamang nilang dalhin ito sa  mga pribadong laboratory.

Aniya, ang mga pasili­dad ngayon ng Bureau of Food and Drugs (BFAD) ay okupado ng ginaga­wang lab test sa mga gatas. Tatlo na sa 54 na sinusuri ng BFAD ang nagpositibo sa mela­mine.

Nilinaw din ni Bacayo na ang resulta ng private lab ay hindi na nanga­nga­­ilangan pa ng BFAD validation dahil kinikilala na­man ng NMIS ang mga testing centers na apru­bado ni Agriculture Secretary Arthur Yap. 

Samantala, sinabi na­man ni Bacayo na ang luncheon meat galing  China na nagpositibo sa pagsu­suri ng Qualibet laboratory ay iligal na ipinasok sa bansa.

Ngunit kamakalawa ay ipinahayag ni Yap na pu­wede pa ang mga meat products mula sa China at walang dahilan upang i-ban ito. (Doris Franche)