GMA sa bagong PNP chief: Ibalik ang kapayapaan sa Mindanao!

Agad na inatasan ka­hapon ni Pangulong Arro­yo si bagong Philippine National Police (PNP) chief Dir. Gen. Jesus Ver­zosa na tumulong sa pag­papanum­balik ng kapa­yapaan sa Mindanao.

Sa ginawang turnover ceremony ng liderato ng PNP sa Camp Crame, nili­naw ng Pangulo na hindi all out war ang nagaganap sa Mindanao kundi isang ‘law enforcement exercise.’

Naniniwala rin ang Pa­ngulo na mahalaga ang karanasan ni Verzosa bi­lang hepe ng PNP lalo pa’t na-assigned na rin ito sa mga hot spots sa Minda­nao.

Sinabi pa ng Pangulo na hindi lamang ang mga krimen sa lansangan ang dapat tutukan ng PNP dahil mahalaga ring ma­ka­tulong ang kapulisan sa pagpa­ panumbalik ng ka­pa­ya­paan sa katimugang bahagi ng Pilipinas.

Panahon na aniya para wakasan ang 40 taong ka­guluhan sa Min­danao kung saan mahigit na sa 120,000 katao ang nama­matay.

Kabilang ngayon sa tinutugis ng gobyerno ang tatlong kumander ng Moro Islamic Liberation Front (MILF) na nanguna sa pag-atake sa ilang probin­siya sa Mindanao mata­pos hindi malagdaan ang me­morandum of agreement on ancestral domain.

Samantala, pinuri rin ng Pangulo si outgoing PNP chief Dir. Gen. Ave­lino Razon Jr. sa mga repor­mang ginawa nito at pag­papanumbalik ng ti­wala ng taumbayan sa kapulisan. (Malou Escudero)