Pagtugis sa 3 kumander ng MILF tuloy

Hindi ititigil ng pama­halaan ang pagtugis la­ban sa tatlong kumander ng Moro Islamic Liberation Front (MILF) na nasa likod ng serye ng pag-atake ng nag-iwan ng maraming pa­tay at su­gatan sa mga lala­wigan ng North Cota­bato, Sa­­ranggani at Lanao Del Norte.

Ito ang siniguro ni Press Secretary Jesus Du­reza, na nanawagan sa mga opisyal ng MILF na pigilin ang kanilang pu­wer­sa at hayaan ang Armed Forces of the Philippines (AFP) at Philippine National Police (PNP) na tugisin sina commander Umbra Kato, Bravo at Aleem Sulaiman Panga­lian.

”If MILF Chairman Al Haj Murad is not capable of bringing in his MILF commanders to answer for the terroristic acts, then his men must stand down while government forces enforce the law,” wika ni Dureza.

Idi­nagdag pa ni Dureza na hindi puwedeng itigil ng PNP at AFP ang ka­nilang operas­yon hang­gang hindi napipi­gil at naparurusahan ang tatlo nang naaayon sa ba­tas.

Sa kabila nito, sinabi ng Mala­cañang na tuloy pa rin ang usapang pang­kapa­ya­paan sa re­beldeng grupo.

Kamakailan, inu­tusan ni Pangulong Arroyo ang AFP at PNP na tugisin ang tat­long commander ngunit pi­naala­hanan sila na iwa­san na masaktan ang mga sibil­yan at ma­kasira ng ari-arian. (Rudy Andal)