Nabigo kahapon ng umaga ang Senado na makakuha ng perfect attendance sa unang araw ng second regular session makaraang hindi nakasipot si Senador Miriam Defensor-Santiago.
Wala namang ibinigay na paliwanag ang Senado kung bakit hindi nakadalo sa sesyon si Santiago bagaman isa ito sa mga miyembro ng Mataas na Kapulungan na naata sang manguna sa pagsalubong kay Pangulong Gloria Arroyo sa Batasan Complex para sa ika-walong State of the Nation Address nito.
Nabigo rin ang senado na magbukas sa takdang oras na alas-10 ng umaga na naging atrasado ng 10 minuto o 10:10.
Kahit late na nang 10 minuto nagbukas ang sesyon ng Mataas na Kapulungan, nahuli pa rin ang dalawang senadora na sina Sen. Pia Cayetano at Sen. Jamby Madrigal.
Si Madrigal ay naka-modernized Maria Clara na gawa ni Patis Tesoro, samantalang ang suot naman ni Cayetano ay parang si Princess Lea ng Star Wars .
Samantala, ilang beses nang napa-ulat na hindi sisipot si dating Pangulong Joseph Estrada sa SONA ng Pangulo bagaman nagtungo naman ito sa Senado kung saan doon pa siya nananghalian.
Kasalo ni Estrada sa pananghalian sina Senate President Manuel Villar at asawa nitong si Las Pinas Rep. Cynthia Villar, Sen. Jinggoy Estrada, Sen. Loren Legarda na naka-Maria Clara; Sen. Richard Gordon; at Sen. Alan Peter Cayetano. (Malou Escudero)