‘Rebolusyon’ pag di na-extend ang CARP

“Rebolusyon mula sa hanay ng libu-libong mag­sasaka sa kanayunan kung hindi na mapalawig pa ang Comprehensive Agrarian Reform Program (CARP).”

Ito ang naging banta kahapon ng may 90-li­bong miyembro ng Ugna­yan ng Nagsasariling Organisasyon sa Kana­yunan (UNORKA) na nagmartsa patungo sa harap ng tanggapan ng Department of Agrarian Reform (DAR) sa Quezon City.

Ayon kay Vangie Men­doza, deputy national coordinator ng Unorka, “walang dahilan para hindi i-extend ang CARP na tunay naman para sa mga magsasakang walang mga lupain”.

Sinabi ni Mendoza, pabor ang Unorka sa pagpapalawig ng Land Acquisition and Distribution dahil ito ay para sa kanilang mga magsasaka na walang sariling lupang sinasaka.

Naniniwala ang grupo na kaya “usad pagong” ang pagpasa ng batas para ma-extend ang CARP ay dahil maraming mga mam­babatas na may-ari ng mga malala­king lupain na ta­tamaan nito.

Binanggit ng UNORKA ang ilang kilalalang puli­tiko na posibleng ma­apektuhan ng CARP ay sina Sen. Juan Ponce Enrile na may malawak umanong lupain sa Ca­gayan Valley, Sen. Aqui­lino Pimentel sa Minda­nao, Sen. Joker Arroyo sa Bicol at iba pang mam­babatas na may ha­ciendero at haciendera sa ibat-ibang lalawigan.

Ayon naman kay DAR Secretary Nasser Pa­ngan­daman, kailangang maipasa ang CARP dahil malinaw na nakasaad sa Konstitusyon ang pagbi­bigay ng lupain sa mga magsasakang walang sa­riling lupang sinasaka. (Angie dela Cruz)