Muntinlupa may ‘discipline zone’ na

Nagtakda na rin ng isang lugar sa kanilang nasasakupan bilang “discipline zone “ ang Muntin­lupa City matapos na ga­yahin nito ang Caloocan, Malabon, Mandaluyong, San Juan at Marikina.

Ayon kay Muntinlupa Mayor Aldrin San Pedro, nakipag-ugnayan na siya kina NCR­PO chief Deputy Director Geary Barias at Southern Police District (SPD) director Chief Supt. Luizo Ticman upang gawing pilot area ang Alabang sa pag­lulunsad ng discipline zone sa kanilang lungsod.

Puspusan umano ang kanilang isasagawang kampanya sa loob ng apat na buwan laban sa lahat ng uri ng kriminalidad sa Ala­bang viaduct at pagpapa-iral ng disiplina sa mga pasaway na tsuper, illegal vendors at pedestrians.

Idinagdag pa ni San Pedro na umaabot sa ma­higit 400,000 katao ang nagdaraan, nanganga­kakal at nagtatrabaho sa Alabang na pinaka-aba­lang lugar sa lungsod araw-araw kaya dito nila sisimulan ang kam­panya sa paglulunsad ng discipline zone area.

Ito rin aniya ang itinutu­ring nilang sentro ng pag­nenegosyo ng lungsod at dito rin nagdaraan ang na­kararaming residente sa Southern Tagalog na nag­tutungo sa kalakhang May­nila kaya’t nararapat la­mang na mapanatili nila ang katahimikan at kaa­yusan sa lugar.  (Rose Tesoro)