P28-B CARP funds, minadyik daw ni GMA

Hinahanap  ni  Se­na­dor Aquilino Pimen­tel Jr. ang P28 bilyong pondong inilaan para sa pagpapatupad ng Comprehensive Agrarian Reform Program (CARP) na ayon sa senador ay biglang nawala at parang mi­nadyik ng adminis­trasyon ni Pangulong Gloria Arroyo.

Sinabi ni Pimentel na  dapat linawin muna ng Palasyo kung saan napunta ang P28 bil­yong nabawi ng pama­halaan sa ill-gotten wealth ng pamilya Mar­cos na inilaan ng natu­rang program.

Kung hindi aniya  mapapatunayan ng Department of Agrarian Reform (DAR) kung saan napunta ang na­turang pondo, maa­aring kapanipaniwala ang alegasyon ng ilang grupong magsasaka na ginamit ang salapi sa nakaraang 2004 pre­sidential elections.

“Dapat matiyak na­tin na ginamit nang tama ang lahat ng pon­dong inilaan sa CARP. Pero, hanggang nga­yon wala pa tayong nakikitang ganito dahil kapag nanganganib ang buhay ng CARP, palagi na lamang si­lang humingi ng pondo upang buhayin ang programa,” paliwanag ni Pimentel.

Muli umanong hu­mi­hingi ang DAR ng halagang P162 bilyong pondo upang tuluyan nang makumpleto ang implementasyon ng CARP.

Pero walang mali­naw na pagkuku­nan ang pamahalaan upang pondohan ang pagpa­pa­tutuloy ng progra­ma sa kabila nang bilyon-bilyong piso ang na­ilaan ng Kon­greso sa pagpapa­tupad ng pro­grama. (Malou Escudero)