Tahasang sinabi ni Manila Mayor Alfredo Lim na depende na lamang kay Boxing Champ Manny Pacquiao kung nais nitong magsagawa ng motorcade sa lungsod ng Maynila matapos manalo sa kanilang rematch ni Juan Manuel Marquez noong Linggo.
Sa ngayon ay walang anumang inihanda ang city government para sa pagdating ni Pacquiao matapos nitong isnabin noong nakaraang laban niya kay Antonio Barrera ang inihanda ng mga Manileño sa kanyang pagdating.
Idinahilan noon ni Pacquiao na mayroon siyang naunang commitment sa Quezon City kung saan nakitang nagtungo ito mismo sa tanggapan ni Environment Secretary Lito Atienza.
Dahil dito, maraming residente ng Maynila na umaasa na makita sa motorcade si Pacquiao ang nadismaya.
Naghihintay lamang sila ng tawag o koordinasyon mula sa grupo ni Pacquiao kung nais nitong mag-motorcade sa Maynila.
“Kagaya ng lahat ng Pilipino, pinapupurihan natin ang mga naging achievements ni Manny para sa bayan. Kaya lang, hindi naman tayo pupuwedeng mamilit ng ayaw,” ani Lim.