Upang mapreserba at mabuhay na muli ang kalidad ng yamang-tubig ng bansa, iniutos ni Pangulong Arroyo sa Department of Environment and Natural Resources (DENR) na estriktong ipatupad ang Clean Water Act of 2004 sa pagtugis sa mga indibduwal at kompanyang lumalabag sa probisyon ng nasabing batas.
Ayon sa Pangulo, ang ating yamang-tubig ay napakahalaga kaya dapat lamang na ito ay maprotektahan hindi lamang alang-alang sa kasalukuyang henerasyon kundi sa mga susunod pa.
Bilang pagpapatunay na seryoso ang pamahalaan sa nasabing kampanya, isang sugar mill sa Iloilo City at isang sangay ng mall chain sa Paranaque City ang pinagmulta ng DENR dahil sa paglabag sa Environmental Law.
Sa kabilang banda, isang kaso na isinampa laban sa isang electronic firm sa Dasmariñas, Cavite ang naisantabi dahil sa agarang pagtupad ng kompanya na maisaayos ang kanyang wastewater problem.
Inatasan naman ni DENR Sec. Lito Atienza ang lahat ng DENR field personnel na tugisin at ihabla ang mga lumalabag sa Clean Water Act.
“We can drastically reduce pollution through our vigilance,” ani Atienza.