Fedex official naiipit sa cellphone
Isang opisyal ng Fedex Airfreight Service ang nasa hot water matapos na payagan daw ito ang reshipment ng kargamentong naglalaman ng mga cellular phones mula sa Hong Kong na natuklasan ng Presidential Anti-Smuggling Group (PASG) sa Subic Freeport.
Inatasan ni PASG chief Undersecretary Antonio Villar Jr. si PASG-Task Force Subic acting deputy director Benny Kho na alamin kay Sam Bautista, Fedex clearance operations manager, kung bakit pinayagan nito ang reshipment ng hot cargo na naglalaman ng mga cellphones noong nakaraang linggo gayung kwestyonable ang mga dokumento nito.
Nabatid ng PASG at Bureau of Customs (BOC) na nakalulan sa 15 freight boxes ang hindi pa mabatid na halaga ng cellphones na naka-consign sa isang Noel Moog at dadaong sa Pilar, Bataan noong nakaraang linggo na walang mga kaukulang dokumento.
Dahil dito, iniutos umano ni Bautista ang agarang reshipment ng nasabing kargamento upang hindi na makadaong at makaiwas sa imbestigasyon ng PASG at BOC.
Batay sa record, ang shipment ay naglalaman ng communications equipment subalit base sa intelligence report ng PASG-TFS ay walang permiso ito mula sa National Telecommunications Commission (NTC).
Ipinaliwanag naman ni Bautista sa liham nito kay Subic Customs special collector for Fedex Zaldy Almoradie na ang reshipment ng cargo ay dahil sa kagustuhan daw ng shipper at consignee. (Rudy Andal)
- Latest
- Trending
