Sen. Villar nag-warning sa ‘killer toy guns’

Malamang dumami ang kaso ng panghoholdap at iba pang krimen dahil sa pagdagsa sa merkado ng mga replica guns sa pana­hon ng kapaskuhan.

Ito ang warning ni Senate President Manny Villar sa pagkalat ng mga baril-barilan na kamukhang-ka­mukha ng mga tunay na armas. Ayon kay Villar, ang ganitong panahon ng pag­diriwang ay may ka­kambal na pagdami ng mga krimen at hindi naka­katulong ang paglaganap ng baril-ba­rilan. “Mas madaling naga­gawa ang krimen gamit ang mukhang tunay na mga baril dahil nabibili ito kahit saan.”

Ani Villar, mismong ta­laan ng pulisya ang nag­sasaad na maraming kri­men tulad ng holdapan at kidnapping ang ginamitan ng mga baril-barilan.

Sa isang tiangge ma­lapit sa Senado, ang isang laruan na kamukha ng ka­libre .45 pistola ay nabibili sa halagang P150 at ang mga laruang armalite at shotgun ay pwedeng ma­kuha sa presyong P300 hanggang P500, saman­tala ang rechargeable armalite ay P1,200.

Isa sa mga kawani sa opisina ni Villar ang nakabili ng palyadong Christmas lights mula sa isang kila­lang tindahan ng mga libro. Pumutok agad ito ng isak­sak sa kuryente.

Sinabi ni Villar na dapat maging maingat ang lahat dahil ang mga palyado at delikadong kalakal ay hindi lamang sa mga bangketa nakakalat kundi maging sa malalaki at sikat na tinda­han din.

“Kailangan ngayon na maging mabusisi ang mga mamimili dahil may mga nandaraya ng selyo ng quality control at marka ng import clearance certificate (ICC),” paalala ni Villar.

Inihain ni Villar ang Re­solusyon 21 na nagpa­pa­kilos sa committee on public order and illegal drugs at committee on trade and commerce para imbestiga­han ang pagkalat ng mga “tunay” na baril-barilan, mga dispaling­hadong pro­dukto at mga kalakal na banta sa buhay at segu­ridad ng mga tao. (Malou Escudero)