‘Gas explosion hindi bomba sa Glorietta’

Kinumpirma kahapon ng pulisya na inaalis na ng pamahalaan ang anggu­long terorismo o pambo­bomba sa Glorietta 2 mall sa Makati City na ikina­matay ng 11 katao at pagkasugat naman ng mahigit sa 100 pa.

Ayon kay PNP chief, Director Gen. Avelino Razon base sa inisyal na findings ng US at Australian experts ay malinaw na isang uri ng ‘accidental gas explosion’ at hindi bomba na gawa ng mga terorista ang pagsabog tulad ng mga naunang espekulasyon.

Inihayag ni Razon na ang pagsabog ay sanhi ng sumingaw na methane gas na humalo sa diesel fuel na naghanap ng ma­lalabasan.

Ang kakapu­san uma­no sa ventilation ng basement ang nagpagrabe pa sa pag­sabog.

Base sa report ng Federal Bureau of Investigation ng US at ng Australian Federal Police ang insidente ay tumutukoy rin sa teorya ng PNP na isa itong uri ng “accidental gas explosion’ na naghi­hintay lamang na maga­nap o tuluyang su­mam­bulat.  

Kahapon ay nangako si SPD Director Chief Supt. Luizo Ticman na sa kaunting panahon na lang ay ilalabas na nila sa publiko ang kumpletong  resulta ng isina­gawang imbestigasyon sa Glo­rietta 2 blast. (Joy Cantos/Rose Tesoro)