ALAGAD President nagpaliwanag sa party-list issue

Sinabi kahapon ni ALAGAD party-list President Diogenes Osabel  na nagkamali ang kanyang partido sa pagnombra kay Rodante Marcoleta bilang Kinatawan ng nasabing partido sa nakalipas na Kongreso.

Sumulat sa PSN si Osabel upang aniya’y “itu­wid” ang napalat­halang ba­lita sa PSN  noong Oktubre 12 kaug­nay ng pagkabigo ng Comelec na iproklama ang ilang kinatawan ng iba’t ibang nanalong party-list kasama na ang ALAGAD dahil hinihina­lang “front” ng religious organizations.

Matinding  pinasinu­ngalingan ni Osabel na iginigiit niyang maipu­westo ang sarili bilang Repre­sentante kaya na­bibinbin ang pag-upo ni Marcoleta.  Ani Osabel si Marcoleta ay pinatalsik na ng executive committee ng ALAGAD dahil hindi na niya pinansin ang mga orihinal na opis­yales at tumangging sumu­nod sa mga alituntunin at pro­grama  ng partido.

“Dahil na rin sa ma­ba­gal at kumplikadong pro­seso ng sistema, nabigo ang ALAGAD sa petisyon sa COMELEC na maalis agad si Mar­coleta bilang Kinatawan sa Kongreso” ani Osabel. Gayunman, noong Hunyo 16, 2007 ibinasura ng First Division ng COMELEC ang nomination ni Marcoleta at ki­nilala si Osabel bilang nominee ng ALAGAD sa Mababang Kapulungan.

“Sana ay maresolba na ng COMELEC ang kaso para maisulong na ng ALAGAD ang mga simu­lain ng partido para sa kapakanan at interes ng mga mararalitang taga-lungsod” dagdag pa ng pangulo ng ALAGAD.