Seat belt law mahigpit na ipapatupad

Dahil sa napaka­ra­ming lumalabag sa batas, hiniling ni Senate President Manuel Villar Jr. sa Land Transportation Office (LTO) at mga local government units (LGU’s) ang mahigpit na pag­papatupad ng Seat Belt law para na rin sa ka­pakanan ng mga moto­rista at commuters.

Naalarma si Villar sa istatistika na ipinalabas ni LTO Chief Reynaldo Ber­roya kung saan aabot sa 1,070 ang nadakip na mga motorista ,  340 dito  ay lumabag sa RA 8750 o Seat Belt Use Act of 1999. Sa ilalim ng na­ banggit na batas, pa­patawan ng ka­parusahan ang mga tsu­per, operator, may-ari ng sasakyan pati ang mga manufacturer, assembler, importer at distributor ng mga sa­sakyan na hindi tuma­talima sa paglalagay at paggamit ng seat belt.

Sa seksyon 4 ng batas, ang nagmama­neho at ang pasahero sa unahan ng pampubliko o pribado mang sasakyan ay obligadong gumamit ng kanilang selt belt habang umaandar ang sasakyan.

Sa mga pampasa­he­rong sasakyan, ang tsu­per ang magpapaalala sa pasahero na gumamit ng seatbelt. Ang pasahero na tatanggi na gumamit nito ay kailangang paba­bain.

Nakatadhana sa ba­tas na pagmumultahin ng P250 ang mga mo­torista para sa unang paglabag; P500 sa ika­lawang pag­labag at P1,000 sa ikat­long paglabag kasama ang isang linggong sus­pensyon ng lisensya.  May bukod pang P300 multa para sa tsuper na hindi magpapaalala sa kaniyang pasahero na gumamit ng seat belt.

Ipinagbabawal din sa batas ang pagpapaupo sa unahan ng sasakyan ng mga batang anim na taong gulang pababa. (Maluo Escudero)