‘Kasambahay Bill’ pasado na sa Senado

Ipinasa na ng Senado sa ikalawang pagbasa ang panukalang “Magna Carta for Household Helpers” na gagarantiya na mabibigyan ng makatao at maayos na working conditions ang mga ka­sambahay o mga ‘katu­long’.

Kung ganap na magi­ging batas, hindi na ma­aaring magtrabaho ang mga kasambahay ng walang kontrata sa pa­gitan nila at ng kanilang employers,

Dapat nakapaloob sa kontrata ang “specific job terms” at mga kondisyon, kabilang na ang probis­yon para sa annual increase kung saan dapat nakalagay kung magkano ang itataas ng sahod ng kasambahay.

Nakasaad din sa ipinasang panukala na mabigyan ng 13th month pay na katumbas ng kan­yang buwanang sahod ang isang kasambahay at dapat din itong maging miyembro ng Philippine Health Insurance Corp. (Philhealth).

Dapat ding maging miyembro ng Social Security  System  (SSS) ang isang kasambahay upang magkaroon ito ng protek­siyon sakaling maaksi­dente o mawalan ng kakayahang magtra­baho.

Hindi rin dapat lu­mampas ng 10 oras ba­wat araw ang trabaho ng mga househelpers at kung lalampas sa 10 oras, dapat silang bigyan ng extra pay.

Nakapaloob din sa panukala ang pagbibigay ng walong oras na pa­hinga o rest day maliban pa ang hiwalay na oras para sa pagkain ng aga­han o breakfast, pana­nghalian, at hapunan.

Hindi rin dapat mag­trabaho ng mahigit sa anim na “consecutive days” sa bawat linggo ang mga kasambahay. Bibig­yan din ang mga ito ng 14 araw na annual vacation leave na may bayad. (Malou Escudero)