M’cañang di maglalagay ng kapalit ni Abalos

Walang balak si Pa­ngulong Arroyo na mag­talaga ng magiging kapalit ng nagbitiw na si Comelec chairman Benjamin Aba­los.

Sinabi ni Executive Secretary Eduardo Er­mita, ang payo ng mga legal advisers ng Mala­cañang kay Pangulong Arroyo ay mas makaka­buting maglagay na la­mang ng magiging kapalit ni Abalos sa Pebrero 2008.

Aniya, kung magla­lagay ngayon si PGMA ng kapalit ni Abalos ay mag­sisilbi lamang ito ng ilang buwan dahil tatapusin lamang nito ang nala­labing termino ng nagbitiw na Comelec chairman.

Wika pa ni Ermita, sa ilalim din ng ating Kons­titusyon ay hindi maaaring magtalaga sa ngayon ang Pangulo ng magiging kapalit ni Abalos sa Comelec dahil nasa ses­yon pa ang Kongreso at maaari lamang siyang magtalaga ng papalit kay Abalos kapag nag-recess na ang Kongreso.

Sa ngayon kasi ay lima pa naman ang na­titirang commissioners ng Comelec kahit nagbitiw si Abalos kaya mayroon naman silang quorum, paliwanag pa ng executive secretary.

Sa Pebrero 2008 ay aabot na sa apat na mi­yem­bro ng Comelec ang dapat italaga ng Pa­ngulo dahil nakatakdang magre­tiro si Commissioner Resurrecion Borra na acting chairman nga­yon. (Rudy Andal)