Miriam nag-walkout

Galit na nilisan ni Senator Miriam Defensor-San­ tiago ang hearing kahapon ng Senado sa kontrober­siyal na national broadband network (NBN) contract dahil nakakaladkad lamang umano ang Mataas na Kapulungan sa pinag-aawayang “kickback”.

Sinabi ni Santiago na hindi siya pabor sa isina­sagawang imbestigasyon dahil may mas dapat pag­tuunan ng pansin ang Senado katulad ng pagdinig sa 2008 national budget at ang pagratipika sa JPEPA o ang tratado sa pagitan ng Pilipinas at Japan.

Naniniwala si Santiago na hindi na dapat makalad­kad ang Senado sa pag-aagawan umano sa kickback mula sa isang legal at lehitimong proyekto ng gobyerno katulad ng NBN.

“Pinag-aawayan ni’yo lang kickback nyo. Inaak­saya ni’yo lang ang oras ng Senado,” galit na pahayag ni Santiago sabay tayo at saka lumabas ng plenaryo.

Pinuna din nito na ka­ramihan naman sa mga senador ay walang legal at trial background kaya hindi ang mga ito dapat magsil­bing prosecutor sa imbes­tigasyon.

Tahasang sinabi ni San­tiago na nag-aalburuto lamang si Joey de Venecia dahil na-double crossed ito sa kontrata.

“Na-double crossed siya eh kaya siya galit. But they were all initially part of a criminal conspiracy…to earn money illegally from a legitimate project,” pahayag ni Santiago.

Pero idinagdag nito na naniniwala siya sa kredibi­lidad ni Neri na isa uma­nong academician at wala namang kinalaman ang kanyang opisina sa pagbi­bigay ng kontrata. Ang tanging ginagawa lamang umano ng NEDA ay ang magsagawa ng theoretical at academic studies kaug­nay sa isang proyekto. (Malou Escudero)