Global warming ramdam na sa Pinas

Bunsod umano ng global warming kaya kahit tag-ulan na sa Pilipinas ay mainit pa rin ang panahon.

Ayon kay Ludy Alviar, senior forecaster ng Philippine Atmospheric Geophysical Astronomical Services Administration (Pag­asa), ina­sahan nilang tat­long bagyo ang tatama sa bansa ngayong buwan ng Hulyo, subalit ni isa man dito ay hindi dumaan sa Pilipinas.

Gayunman, umaasa ang Pagasa na kahit dala­wang bagyo ay tatama sa bansa sa Agosto baga­mat noong una ay tinaya nilang apat na bagyo ang dadaan sa bansa sa susunod na buwan.

“We were supposed to experience three typhoons this July but they failed to form, or they veered away. This August there should be four typhoons, but we’d be happy to end up with two,” dagdag ni Alviar.

Ang bahagi ng Metro Manila at kalapit lalawigan ay dumadanas na ng dalawang oras na brownout matapos na mabigo na makapagproduce ng kur­yente ang hydroelectric plants ng Napocor dahil sa kakulangan ng ulan sa bansa.

Sinasabi ng Napocor na dahil sa mababang patak ng ulan na tuma­tama sa mga dams parti­kular sa Angat, Magat, Pantabangan, San Ro­que at Binga hindi maka­pag­bigay ng sapat na suplay ng kuryente ang planta ng ahensiya.

Inaasahan naman na magtatagal pa ang pagka­karoon ng brownout sa mga lugar sa Metro Manila at karatig lalawigan kapag nagpatuloy na bumaba ang kailangang tubig sa naturang mga dam dahil sa kakulangan ng pag-uulan sa bansa.

Sinabi pa ni Alviar na ang pag-uulan ay narara­nasan lamang sa ngayon sa Visayas at Mindanao, kung saan matatagpuan ang intertropical convergence zone (ITCZ) .

Dinagdag pa ni Alviar na magpapatuloy ang mainit na panahon kahit na tag-ulan sa kasalu­kuyan dahil sa epekto ng global warming.

“Yes, it’s the effect of global warming. It’s very hot and humid,” pagtatapos ni Alviar.

Samantala, isinisi na­man ni Sen. Loren Le­garda sa “shortage” ng mga punong kahoy ang napi­pintong kakulangan sa tubig.

Dapat aniya’y binibig­yang prayodidad pa rin ng gobyerno ang pagtatanim ng puno upang maiwasan ang krisis sa tubig at iba pang uri ng kalamidad. (Dagdag ulat ni Malou Escudero)