Kilos-protesta vs political dynasty

Isang bagong tatag na kilusan na mariing kumokondena sa pag-iral ng political dynasty sa bansa ang nagbantang magsasagawa ng kilos-protesta upang ipahayag ang kanilang paninindigan at tuloy hikayatin ang mga botante na huwag iboto ang mga kandidatong "Kamag-anak Inc." sa hanay man ng administrasyon o oposisyon.

Sinabi ng anti-dynasty advocate na tinawag na Alyansa Laban sa Dinastiya (ALADIN) na kinabibilangan ng mga grupo mula sa iba’t ibang sektor ng lipunan na panahon na upang wakasan ang pananatili sa kapangyarihan ng mga magkakamag-anak sa pulitika.

Ayon kay Atty. Ruby Bruno, taga-pangulo ng ALADIN, dapat nang matigil ang paglaganap ng political dynasty upang magkaroon ng tunay na pagbabago, hindi lamang sa sistema ng pulitika kundi pati na rin sa mga karakter at katangian ng mga taong nakaupo sa gobyerno.

Binigyang-diin ni Bruno na marami sa mahigit 30 milyong Pilipino ang mayroong kuwalipikasyon o kakayahan na tumakbo at maupo sa gobyerno kaysa mga pulitikong magkakamag-anak na kasalukuyang nakaluklok o naghahangad ng puwesto. (Angie dela Cruz)