Gov. Valera ipapatawag

Ipapatawag ng Task Force Bersamin si Abra Governor Vicente ‘Vic’ Valera kaugnay ng pagpatay kay Rep. Luis ‘Chito’ Bersamin Jr. noong Disyembre 16 sa Quezon City.

Ayon kay PNP-Criminal Investigation and Detection Group (PNP-CIDG), Director Jesus Verzosa, ang hakbang ay upang kunin ang panig ni Valera matapos siyang ituro ng suspect na si Rufino Panday na umano’y nagpondo ng P5M para iligpit ang solon dahil tinik ito sa planong pagtakbo ng misis ng una na si Ma. Zita Valera sa gubernatorial race sa lalawigan sa 2007 elections.

Nauna nang inamin ni Panday, dating Duty Sergeant ng binuwag na Philippine Constabulary na siya ang nagsilbing lookout sa krimen.

Sinabi ni Panday, ang inisyal na P500,000 ay naibayad na sa kanila at ang balance ay ibibigay umano kapag naisakatuparan ang pagpatay sa mambabatas.

Ang nasabing halaga ay ibinigay umano sa kanila ni dating La Paz Abra Mayor Freddie Dupo na kilala namang kaalyado ni Valera.

Ayon kay Verzosa, bukod sa pagtatanong ay makakatulong din ng malaki sa imbestigasyon ng Task Force para makilala ang iba pang mga salarin at maaresto sa lalong madaling panahon ang mga sangkot sa krimen.

Idinagdag pa ng opisyal na malaki ang maiaambag ng magiging pahayag ni Valera dahil sa may mga inihayag itong ibang anggulo na dapat imbestigahan din ng Task Force. (Joy Cantos)