Mass blood donation vs dengue inilunsad

Dahil na rin sa layuning makatulong sa pagsugpo ng paglaganap ng sakit na dengue sa bansa kung kaya naglunsad ng ‘series of mass blood donation drives nationwide’ si BUHAY Party-list Cong. Christian Seneres.

Ang proyekto ay tinawag na "Buhay mo Sagot Ko" kung saan katuwang ni Seneres ang Philippine National Red Cross (PNRC) at Councilor Ariel S. Arceo ng Guiguinto, Bulacan.

Sa isinagawang ‘blood donation’ sa Baliuag University at Bulacan State University kamakailan, sinasabing magbibigay ng sapat na supply ng dugo na maaring gamitin para sa ‘blood transfusion’ sa mga biktima ng dengue na nasa ibat-ibang hospital sa nasabing lalawigan.

Pinasimulan ni Seneres sa Bulacan ang programa dahil sinasabing ‘critical’ ang nasabing probinsiya makaraang makapagtala ng pinakamataas na bilang ng dengue cases sa Central Luzon ngayong taon.

Sa rekord ng Region 3 Epidemiology and Surveillance Unit, lumilitaw na ang Bulacan ang may pinakamataas na bilang na sakit na dengue na may kabuuang 814; Nueva Ecija, 482 cases; Pampanga, 472 cases mula Enero-Setyembre taong kasalukuyan.

Ang PNRC at BUHAY Party-list ang nangungunang tumutulong ngayon sa mga pasyente na may sakit na dengue sa bansa. (Mer Layson)