Dahil kay Jamby: Pimentel, Enrile nagkasagutan

Nagkainitan kahapon sa sesyon sina Sen. Juan Ponce Enrile at Senate Minority Leader Aquilino Pimentel Jr. habang tinatalakay ang Anti-Terrorism bill.

Ayon kay Sen. Enrile, ilang ulit na siyang sumalang sa pagtatanong ng ilang senador mula pa noong Pebrero hanggang nitong nakaraang buwan, subalit hindi pa rin ipinapasa ang naturang panukala.

Gusto ni Enrile na tapusin na ng Senado ang debate sa naturang bill pero iginigiit ni Sen. Pimentel na marami pang gustong magtanong gaya ni Sen. Jamby Madrigal.

Nais ni Enrile na isalang na sa botohan ang anti-terror bill at huwag nang hintayin pa si Sen. Madrigal dahil palaging wala ang senadora.

Duda ni Enrile ay gumagawa ng delaying tactics si Madrigal at ang oposisyon para harangin ang pagpasa ng napaka-importanteng batas laban sa terorismo.

Pero sinuportahan si Madrigal ng kanyang kakampi sa minorya hanggang sa magsagutan sina Pimentel at Enrile dahilan para tapusin ni Senate President Manuel Villar Jr. ang sesyon upang payapain ang dalawa. (Rudy Andal)