Daan-daang residente inilikas sa Bulusan

Daan-daang residente na nakatira sa idineklarang 4 kilometer permanent danger zone sa palibot ng Mt. Bulusan sa Sorsogon ang inilikas matapos magbuga ng makapal na abo ito kamakalawa.

Ayon kay Maj. Gen. Glen Rabonza (Ret.) ng Office of Civil Defense, matapos magbuga ng may taas na 3.5 kilometrong abo ang Mt. Bulusan bandang alas-3:56 kamakalawa ng hapon ay nagsimula nang lumikas ang mga residente na nasa 4 kilometer permanent danger zone.

Ang mga residente mula sa mga bayan ng Irosin, Juban, Casiguran, Bulusan, Barcelona at Gubat ang inilikas matapos ang panibagong pag-aalburoto ng Mt. Bulusan kamakalawa.

Personal na binisita noong Sabado ni Pangulong Arroyo ang ginagawang paghahanda ng pamahalaan para matiyak ang kaligtasan ng mga residente na nasa paanan ng Mt. Bulusan.

Nagtungo si PGMA sa Juban, Sorsogon noong Sabado para masigurong naipapatupad ang no-man zone sa 4 kilometer danger zone. (Joy Cantos/Lilia Tolentino/Angie dela Cruz)