Escudero, Marcos nagkakainitan

Nagkakainitan sina House Minority Leader Francis Escudero at Ilocos Norte Rep. Imee Marcos dahil sa pagbabanta ng una na sisipain sa hanay ng oposisyon ang hindi susuporta sa 2nd impeachment laban kay Pangulong Arroyo.

Sinabi ni Rep. Marcos, walang karapatan si Escudero na manakot na sisipain sa oposisyon ang hindi susuporta sa 2nd impeachment complaint kay PGMA.

"Walang karapatang manakot si Escudero laban sa amin. Bakit, monopolisado ba niya ang minority bloc? Siya lang ba ang marunong lumaban sa administrasyon," wika pa ni Marcos.

Hinamon din ng lady solon si Escudero na patunayang tunay siyang oposisyon sa pamamagitan ng pagkontra sa usapin ng mataas na singil sa kuryente at tubig at sa pamilyang nagmamay-ari nito.

Magugunita na isa si Marcos sa mga miyembro ng oposisyon sa Kamara na hindi bumoto para sa unang impeachment complaint laban kay Pangulong Arroyo. (Malou Rongalerios)