Gutierrez, bagong Ombudsman

Hinirang kahapon ni Pangulong Arroyo bilang bagong Ombudsman si Presidential Legal Counsel Merceditas Gutierrez kapalit ng nagbitiw na si Simeon Marcelo.

Si Gutierrez ang kauna-unahang babaeng Ombudsman sa bansa. Siya ang hahawak ng mga kaso ng katiwalian laban sa mga tao ng gobyerno.

Nangako ito na walang sisinuhin kahit balitang malapit siya kay First Gentleman Mike Arroyo. Ito’y tugon sa balitang may kinalaman ang pagiging malapit niya sa Malacañang sa bago nitong puwesto.

Dalawa ang mahigpit na nakalaban ni Gutierrez sa puwesto, sina Sandiganbayan Associate Justice Diosdado Peralta at Deputy Ombudsman for Luzon Victor Fernandez.

Bago natalagang Presidential Legal Counsel, si Gutierrez ay dalawang ulit naging acting Justice Secretary. Tapos siya ng law sa Ateneo de Manila at mayroon siyang ispesyalisasyon sa international law sa Institute of Social Studies sa the Hague, Netherlands. Graduate siya ng BS Elementary Education sa College of the Holy Spirit. (Lilia Tolentino)