"Naipangako ko na kay Pablo (Planas) na iharap ito kay President Gloria Macapagal-Arroyo upang masolusyunan ang ating problema sa gasolina," ani Drilon sa paglulunsad ng KSTC para naman sa motorsiklo sa Manila Yacht Club sa Roxas blvd. kamakailan.
Ang KSTC (www. khaos.ph) para sa motorsiklo ay nagkakahalaga ng P1,690 bawat isa. Inilabas ito ng imbentor na si Planas bunsod na rin ng matinding kahilingan ng mga tricycle drivers nang malamang epektibo ang naunang tipid-gas gadget na para sa mga de-gasolinang sasakyan na nagkakahalaga naman ng P6,500.
Ayon kay Drilon, panahon na para kilalanin ng pamahalaan ang imbensiyon ni Planas, lalo’t patuloy na namomroblema ang pamahalaan at mamamayan sa patuloy na pagtaas sa presyo ng langis.
"Kung mabibigyan lang natin ito ng suporta, uunlad ang Pilipinas," sabi pa ng Senate president.
Sinabi pa rin ni Drilon na dapat pang tumanggap ng kakaibang pagkilala si Planas na isa lamang dating tsuper at mekaniko.
Hindi kasi ito nasilaw sa multi-milyong pisong alok ng bansang Amerika para lamang ibenta ang "formula" ng kanyang imbensiyon. Katwiran ni Planas, "Bayan muna bago ang banyaga".
Dahil dito ay lalong napahanga si Drilon sa pagiging makabayan ng imbentor. Kakaiba raw kasi ito sa nangyaring imbensiyon na ‘fluorescent bulb’ ng Filipino inventor na si Engr. Agapito Flores na sumikat matapos ibenta sa Amerika ang kanyang produkto.
Hanggang sa kasalukuyan, patuloy ang pagtaas ng presyo ng gasolina.
Naglunsad na ng kilos-protesta ang mga driver sector noong nakalipas na linggo at nakatakdang magwelgang muli ngayong araw dahil kung patuloy umanong tataas ang presyo ng gasolina, lalo lamang malulugmok sa kahirapan ang bansa. (Rudy Andal)