38 Pinoy na inaresto sa Pakistan, makakauwi na

Matapos na masabat, maaresto at makulong dahil sa illegal na pangingisda sa karagatan ng Pakistan, inihayag kahapon ng Department of Foreign Affairs (DFA) na inaasahang makakauwi na ngayong linggo ang 38 Filipino fishermen sa bansa.

Kinumpirma ito ni Foreign Affairs Sec. Alberto Romulo matapos na magpadala ng report ang mga kinatawan ng Embahada ng Pilipinas sa Pakistan na sina Jorge Arizabal, Agnes Cervantes at Jose Villoria na siyang naatasang magsaayos nang pagpapabalik ng mga mangingisda.

Ayon kay Romulo, isinasaayos ang mga requirements para makalabas ng Landi District Jail sa Malir Karachi, Pakistan ang 38 mangingisdang Pinoy.

Nabatid na tutustusan ng gobyerno ng halagang $20,437.16 ang repatriation expenses ng mga Pinoy kabilang na ang kanilang plane tickets.

Tutulungan din ng DFA na makuha ang unpaid salaries ng mga mangingisda na umaabot sa siyam na buwan mula sa kanilang Singaporean based Beverly Manning Agency. (Mer Layson)