Sindikato sa emission testing centers, ibinulgar

Mariing kinondena kahapon ng grupo ng mga environmentalists ang ilang sindikato ng emission testing centers na nag-ooperate sa Metro Manila na responsable sa pandudoktor ng mga bagsak na resulta ng emission test para maipasa at maiparehistro ang mga sasakyan sa Land Transportation Office (LTO) kapalit umano ng malaking halaga.

Anila, ilan sa sangkot sa sindikato ay kasapi umano ng Private Emission Testing Center Owner’s Association (PETCOA).

Binulgar ng mga environmentalists na may malakas umanong koneksiyon sa ilang tiwaling opisyal ng LTO, DENR at DOTC ang ilang opisyal ng PETCOA kaya "untouchable" ang grupo ng sindikato.

Ilan sa mga binabanggit ng mga environmentalists ay ang Tower Emmission, Royjuls Emission at Achilles Emission na miyembro ng PETCOA.

Binunyag ng grupo na ilan sa mga emission testing centers na sangkot ay ilang ulit nang sinuspinde dahil sa umano’y talamak na katiwalian subalit patuloy na nag-ooperate dahil na rin sa pakikipagsabwatan umano ng ilang tiwaling opisyal at tauhan ng nabanggit na mga ahensya. (Ulat ni Ellen Fernando)