Apela ng FPJ camp dadalhin sa kalye

Dadalhin na ng kampo ng namayapang presidential candidate na si Fernando Poe, Jr. ang kanilang election protest sa kalsada.

Ito ang sinabi kahapon ng tagapagsalita ng kampo ni FPJ na si Rex Cortez, kaibigang aktor ni Da King, kung saan tiniyak nito na iindahin ng panig ng administrasyong Arroyo ang kanilang isasagawang kilos-protesta.

Aniya, patuloy na naghahanda ang mga supporters ni FPJ para magsagawa ng nasabing rally sa Mendiola dahil sa umano’y hindi pantay na hustisya na ibinigay ng korte kaugnay ng poll protest ni Da King.

Dapat na rin anyang palitan ang Presidential Electoral Tribunal ng People’s Electoral Tribunal dahil wala naman umanong pantay na hustisya na ibinibigay ang Supreme Court sa pagiging PET nito.

Taumbayan na lamang umano ang siyang maghusga kung sino talaga ang nanalo noong May 10, 2004. (Ulat ni Grace dela Cruz)