DOTC umaksyon vs extort racket

Ipinag-utos ni DOTC Secretary Leandro Mendoza ang pagsasampa ng kasong pangongotong sa isang undersecretary ng Malacañang Media Affairs, ilang public relations practitioners at tiwaling miyembro ng media. Ang pagsasampa ng kaso ay inirekomenda ni Mendoza sa NBI at sa Department of Justice (DOJ) bunsod ng pagkakahuli kay Usec. Nolan Sison sa pamamagitan ng DOTC surveillance system, habang umano’y nangongotong ng P1milyon sa ilang opisyal ng DOTC.

Agad namang sinibak ni Pangulong Arroyo si Sison, na nagpakilala umano na miyembro ng anti-corruption group na Philippine Monitoring Group o PMG. Isinabit rin ni Sison ang isang Richard Rivera, dating newscaster ng Channel 9 sa extortion attempt. Si Rivera ang sinasabing leader ng PMG na direktahang humingi ng 1 milyon mula sa DOTC kapalit ng di nito paglulunsad ng isang smear campaign laban kay Mendoza habang nirerebisa ng Commission on Appointments ang kanyang appointment.

Ang PMG ang sinasabing spin-off ng media group ng KNP na na-disband nang matalo si Fernando Poe, Jr. sa May elections. Napag-alaman na noong Hunyo pa sinimulan umano ni Sison at PMG ang tangkang pangongotong sa DOTC. (Ulat ni Edwin Balasa)