Kinilala ni PNP Directorate for Intelligence P/Director Robert Delfin ang nasabing mga commander na sina Leo Velasco at Prudencio Kalubid, pawang pinuno ng Special Operations ng Military Staff ng NPA.
Si Velasco ay dating pinuno ng Regional Party Committee ng NPA sa Region 2 Command habang si Kalubid naman ay dating secretary ng Regional Party ng NPA sa Region 8.
Sinabi ni Delfin na kasama ngayon ng dalawang opisyal ang kanilang tatlo hanggang apat na miyembro ng NPA liquidation squad upang ikasa ang balaking pagpatay sa mga prominenteng personahe sa pulitika.
Nangunguna sa assassination plot si FPJ habang hindi rin naman inialis ang posibilidad na maliban kay Da King ay target ring ilikida ng grupo si Pangulong Arroyo at iba pang matataas na opisyal ng pamahalaan.
Kasama rin sa planong paglikida kay FPJ ay upang palitawin ng makakaliwang grupo na palubhain ang senaryo sa bansa.
Binigyang diin ng opisyal na sadyang may kakayahan sina Velasco at Kalubid na maisakatuparan ang pagpatay laban kina FPJ, GMA at iba pa dahilan na rin sa naging partisipasyon nito sa pagtumba sa ilang mga kilalang personalidad tulad ni dating Cagayan Congressman Rodolfo Aguinaldo. (Ulat ni Joy Cantos)