Sabi ni Estrada na posibleng si Christopher Jordan na ng Loma Linda University Medical Center, Califoria, USA ang magsagawa ng operasyon sa kanya dahil mas mura ang hinihingi nitong bayad kumpara kay Mow.
Nag-usap na aniya sila ni Jordan at humihingi lamang ito ng halagang $30,000 hanggang $50,000 para sa actual operation at professional fees.
Magugunitang napaulat na posibleng hindi matuloy ang operasyon ni Estrada dahil sa napakataas na hinihingi ni Mow kaya naghanap ang pamilya nito ng mas murang doktor.
Umaabot sa $1.3 milyon ang professional fee na hinihingi ni Mow kabilang na ang bayad sa iba pang doktor.
Inihayag din ni Estrada na katulad ni Mow, hindi pa rin alam ni Jordan ang history ng kanyang sakit sa tuhod.
Pinayagan ng korte na makalabas ng bansa si Estrada upang maipaopera ang kanyang tuhod sa Amerika noong Disyembre 23, 2003. (Ulat ni Malou Rongalerios)