FPJ bumilib sa 3 testigo

Nagpasalamat kahapon si KNP standard bearer Fernando Poe Jr. sa Commission on Elections kaugnay sa naging patas na desisyon nito ng ibasura ang petisyon ni Atty. Victorino Fornier para sa kanyang diskuwalipikasyon.

Sinabi ni FPJ sa kanyang statement, pinasasalamatan din niya ang kanyang mga supporters, gayundin ang matatapang na empleyado ng National Archives na sina Vicelyn Tarin, Remmel Talabis at Emman Llanera dahil sa pagsisiwalat ng mga ito ng katotohanan kahit itinaya nila ang kanilang buhay at trabaho sa ginawa nilang pagbubunyag laban kay Archives director Ricardo Manapat.

Wika pa ni FPJ, dapat hangaan ang katapangan at katatagan ng loob ng 3 testigo na nagbulgar ng lahat nilang nalalaman laban kay Manapat sa isinagawang imbestigasyon ng Senado. Aniya, sina Vicelyn, Remmel at Emman ang mga unang mamamayan ng bagong Pilipinas.

"I have a Filipino father so, I am a Filipino. I did not apply for naturalization so I am a natural-born citizen," paliwanag pa ni Da King. (Ulat ni Rudy Andal)