Matapos ang apat na buwan na pagkakaratay simula noong Abril 8, 2003 sa Intensive Care Unit (ICU) ng Sunny Brook Hospital ay binawian ng buhay si Dr. Ernesto Yangga.
Si Yangga ay nagtatrabaho bilang doktor sa Laspley Family Doctors Clinic sa Canada kung saan isa ito sa masugid na tumutulong sa pag-aasikaso sa mga pasyente na tinamaan ng SARS sa Canada.
Samantala, ayon kay Dr. Troyo Hepte, medical specialist ng National Epidemiology Center ng Department of Health (DOH) na nakikipag-ugnayan na sila sa World Health Organization (WHO) kung positibong namatay sa sakit na SARS si Dr. Yangga.
Nabatid na si Yangga ang pang-44 na biktima na namatay sa sakit na SARS sa Canada.
Nilinaw din ni Dr. Hepte na ipinapaubaya na lamang nila sa pamilya ng nasawi ang pagdedesisyon kung iuuwi nila sa Pilipinas ang bangkay o susunugin bago ibalik sa bansa. Maaring iuwi ang mga labi ng ligtas kung isisilid ito sa isang hermetically sealed coffin dahil ito ang advisable na proseso upang maiwasan ang posibilidad na kumalat ang taglay nitong virus, (Ulat ni Gemma Amargo)