Ayon sa isang mataas na opisyal ng SC na tumangging magpakilala, ilalabas na nila anumang araw ngayon ang kanilang desisyon sa motion for reconsideration sa kaso ni Lacson.
May posibilidad umano na mabago ang botohan ng 15 mahistrado ng Korte dahil nagretiro na ang ilan sa mga ito na sinasabing kadikit ni Lacson.
Kabilang sa mga SC Justice na nagretiro na at umano’y malapit kay Lacson sina Associate Justices Santiago Kapunan, Jose Melo at Bernard Pardo.
Napag-alaman pa sa source na si dating Associate Justice Sabino de Leon ang orihinal na ponente sa kaso at ang rekomendasyon nito ay isulong ang pagsasampa ng kasong kriminal laban sa senador.
Dahilan dito kaya malaki umano ang posibilidad na muling buksan ang kaso ni Lacson na magiging daan upang arestuhin ito.
Si Lacson ay itinuturing na umano’y kasama sa pagpatay sa 11 miyembro ng Kuratong Baleleng robbery syndicate sa Quezon city. (Ulat ni Gemma Amargo)