'Garapata'sa DPWH pinapasilip kay Fernando

Pinasisilip ng isang mambabatas kay Public Works and Highways Secretary Bayani Fernando ang ilang opisyal ng kanyang departamento na tinawag nitong "garapata" dahil sa pagiging utak ng sindikato at sangkot sa mga ‘money making scheme’.

Sinabi ni Iloilo Rep. Augusto Boboy Syjuco na hindi lamang ang mga lansangan ang dapat linisin ni Fernando mula sa mga nagkalat na illegal vendors kundi maging sa loob ng DPWH na ‘nagbebenta’ ng mga proyekto ng departamento sa mga maimpluwensyang kontraktor.

"It is high time the DPWH is purged of blood sucking parasites and breeding on our rapidly hemorrhaging public coffers," ani Syjuco.

Inihalimbawa nito ang talamak na katiwalian sa DPWH Visayas region kung saan isa umanong opisyal doon ang nangungumisyon ng 5 porsyento sa bawat proyekto ng gobyerno. Siya rin umano ang pumipili ng mga papaborang kontraktor upang masiguro na makakakuha siya ng komisyon. (Ulat ni Malou Rongalerios)