GMA lola na!

Babae ang unang apo ni Pangulong Arroyo sa panganay na anak na si Pampanga Vice Governor Mikey Arroyo matapos magsilang sa pamamagitan ng ceasarean ang manugang nitong si Angela noong Lunes ng gabi sa Makati Medical Center.

Mikaela Gloria ang ipapangalan sa bata na kumbinasyon ng pangalan ng Pangulo at First Gentleman Mike.

Sa Nobyembre 17 pa sana nakatakdang magsilang si Angela pero biglang pumutok ang panubigan nito. Dakong alas-10:45 ng iluwal ang sanggol na tumitimbang ng 7.1 lbs.

Nakuha ng sanggol ang best features ng kanyang mga magulang lalo na ang dimple ng mga Montenegro.

Mula naman sa Cambodia, inihayag ni Press Secretary Ignacio Bunye na tuwang-tuwa ang Pangulo ng matanggap ang balita mula sa kanyang anak na si Luli na may apo na siya.

Ayon sa Pangulo, sa grupo ng kanyang mga kasabayan sa pag-aaral ay siya na lamang ang walang naipagmamalaking apo kaya masaya ito at excited ng makita ang sanggol.

Ikinasal sina Mikey at Angela noong Hunyo 24 sa Lubao Cathedral sa Pampanga sa itinuturing na "wedding of the year." (Ulat ni Lilia Tolentino)