Blood money ni Gasmen tinatrabaho ng Kamara

Inilunsad kahapon sa Mababang Kapulungan ng Kongreso ang "Isang Libo Para kay Primo" fund drive na inaasahang makakapagligtas sa OFW na si Primo Gasmen na nakatakdang pugutan ng ulo sa Saudi Arabia sa Enero 2003.

Layunin ng fund drive na makakolekta ng P213,000 o P1,000 sa bawat isang kongresista. Sa kasalukuyan ay may 213 miyembro ang Kamara.

Ang nasabing salapi ay ipandadagdag sa P780,000 o $15,000 blood money na kinakailangang bayaran sa pamilya ng umano ay biktima ni Gasmen na si Khim Bahadur Gurung, isang Nepalese.

Nakatakdang maghain ng resolusyon para sa nasabing kampanya si Negros Occidental Rep. Apolinario Lozada upang maumpisahan na ang fund raising campaign sa darating na Lunes, Setyembre 30 sa muling pagbubukas ng sesyon. (Ulat ni Malou Escudero)