Pulitika at iringan sa PNP pinatigil ng Pangulo

Sinermunan ni Pangulong Arroyo ang PNP at pinaringgan ang mga reklamador na heneral partikular ang grupo nina Generals Edgardo Aglipay at Reynaldo Berroya na itigil na ang internal politics sa PNP.

Sa kanyang talumpati sa turnover of command sa PNP sa Camp Crame, binigyan diin ng Pangulo na nagugulo ang police organization dahil sa mga intrigahan at iringan ng ilang opisyal.

Pinasaringan ng Pangulo ang mga nagrereklamong police officials na naalis sa puwesto dahil sa pagkabigong masugpo ang illegal na sugal. Binigyang diin ng Pangulo na panahon na para magtrabaho at magkaisa ang PNP.

Kanyang tinukoy na may image problem sa peace and order at may operational problems na kailangang tugunan.

Idinagdag pa ng Pangulo na kailangan anya ng kapayapaan at kaayusan upang i-promote ang turismo at pamumuhunan. (Ulat ni Ely Saludar)