Ito ang ipinahayag kahapon ni Sen. Noli de Castro sa isang press conference matapos nitong makausap ang emisaryo na si Prof. Max Jundam ng University of the Philippines (UP) na personal na nagtungo sa Sulu para makipagnegosasyon sa pagpapalaya kay dela Cruz.
Unang hiningi ng mga kidnaper na umano’y mga dating miyembro ng Moro National Liberation Front (MNLF) na may koneksiyon sa PNP at AFP integrees ang P40 milyong ransom hanggang sa maibaba na ito sa P11 milyon.
Wika ni de Castro, payag umano ang mga kidnaper ni Arlene na bayaran muna ang paunang P1 milyon at kanilang palalayain si Arlene.
Aniya, nakausap niya ang mismong nagbabantay kay Arlene na si Lakandula at siniguro nitong kapag nakabayad ng P1M paunang ransom ay palalayain nila ito habang ang balanse na P10M ay puwedeng bayaran na lamang kapag nakalaya na ang broadcaster.
Isang larawan din ang ipinakita ni Sen. de Castro sa media kung saan ay payat na ang journalist bukod sa mayroong skin disease. Si Arlene ay dinukot ng armadong grupo na pinangunahan ng isang Ronnie na umano’y tauhan naman ng isang PNP officer na MNLF integree noong Enero sa pag-aakalang may dala itong ransom payment para sa kalayaan ng mag-asawang Martin at Gracia Burnham na hostage ng Abu Sayyaf.
Sinabi ni dela Cruz sa kanyang liham na ipinadala kay Prof. Jundam na kapag nakalaya siya ay ibubunyag niya ang kanyang nalalaman tungkol sa militar. (Ulat ni Rudy Andal)