Utang ng gobyerno sa mga beterano lumobo na sa P14 bilyon

Nanawagan kahapon ang may 88,000 mga beterano ng bansa sa Malacañang na gumawa na ng mabilisang aksyon upang mabayaran ang lumobo nang pagkakautang sa pension na umaabot sa P14 bilyon mula pa noong 1994.

Sinabi ni Commodore Artemio Arugay, administrator ng Philippine Veterans Affair Office, na isa-isa nang nangangamatay ang mga beteranong nararapat na makatanggap ng pension dahil sa hirap ng buhay na kanilang nararanasan.

Nakipag-usap na umano siya kay Pangulong Arroyo at iginiit dito na magsagawa na ng mabilisang solusyon upang maramdaman naman ng mga beterano ang gantimpala sa pakikipaglaban nila sa bansa noong World War 2.

Mula nang maisabatas ang pagbibigay ng pension noong 1994, libo-libong mga beterano at pamilya nila ang kasalukuyang hindi pa nakatatanggap o kulang ang nakukuha sa dapat sana’y P4,500 halaga kada buwan. (Ulat ni Danilo Garcia)