GMA sinungaling - Sen. Recto

Bumaligtad na si administration Senator Ralph Recto makaraang kalabanin si Pangulong Arroyo matapos nitong akusahang isa umanong sinungaling ang huli at mistulang sirang plaka na at lumang tugtugin ang iniulat nito sa bayan na umangat ang ekonomiya ng bansa kumpara sa nakalipas na taon.

Sa ibinigay na pahayag ni Senator Recto sa isang press statement sa Senado, hindi anya dapat magyabang ang pamahalaang Arroyo sa unti-unting pagyabong ng ekonomiya dahil mas lalo pang naging malala ang sitwasyon.

Kasinungalingan umano ang pahayag ng Pangulo dahil patuloy pa ring dumaranas ng matinding krisis ang buong daigdig matapos ang September 11 terrorist attack sa Estados Unidos na nagpabagsak sa ekonomiya.

Pinayuhan ni Recto ang pamahalaang Arroyo na magpatupad ng mga bagong reporma sa sistema ng ekonomiya upang makita ang tunay na pagsulong ng kabuhayan sa bansa.

Makaraan ang humigit-kumulang sampung buwang panunungkulan, nananatiling problemang nasilip ng oposisyon kay Pangulong Arroyo ang isyu ng basura, trapiko at seguridad ng mamamayan.

Bagamat pinapurihan ni Sen. Blas Ople ang ilang economic achievements ni Arroyo, hindi itinago ng mambabatas ang malaking pagkadismaya sa liderato, partikular dahil sa lumalalang problema sa basura.

Ayon kay Ople, dapat pagtuunan ng pansin ng Pangulo sa pagpasok ng 2002 ang usapin sa edukasyon, kalusugan, pabahay, food security at public transport.

Sinabi naman ni Sen. Edgardo Angara na malabong matamo ang minimithing paglago pa ng ekonomiya sa taong 2002 bunga ng maling prayoridad sa pambansang pondo na itinuring niyang anti-poor budget.

Sinabi rin ni Angara na hindi sagot sa krisis ang mga numero at projections ng mga economic manager ng pamahalaan. (Ulat ni Rudy Andal)