Walang ransom sa mag-asawang Burnham

Muling nagpahayag kahapon ng apela ang Estados Unidos sa bandidong Abu Sayyaf Group na pakawalan ng maayos sa lalong madaling panahon ng walang anumang kapalit na kondisyones ang mag-asawang Martin at Gracia Burnham.

Ayon sa US State Department, hindi kailanman makikipag-negosasyon ang America sa mga terorista gaya ng Sayyaf at hindi rin anya magbabayad ng ransom ang US kapalit ng kalayaan ng mag-asawang misyonaryo.

"We’ve made it clear, we don’t make concessions to terrorists, we don’t pay ransom... our view is that they should be released immediately and unconditionally and safely," ayon kay Richard Boucher, US State Department spokesman.

Sinabi pa ni Boucher na nanggagalaiti na ang gobyerno ng Amerika sa mga bandido at hindi rin nila ibibigay ang ransom demand na $2 million.

Ang pahayag na ito ng US ay kaugnay na rin ng malimit na banta ng Sayyaf na kanilang papatayin ang mag-asawang Burnham kapag hindi sumunod ang pamahalaang Arroyo at US sa kanilang kagustuhan.

Bukod sa mga Burnham, patuloy pa ring binibihag ng mga bandido ang Pinay nurse na si Deborah Yap. (Ulat ni Rose Tamayo)