Garchi, Badoy binigyan ng 48 oras ng Korte

Binigyan ng Korte Suprema ng 48-oras sina Sandiganbayan Presiding Justice Francis Garchitorena at Third Division Chairman Anacleto Badoy para magsampa ng kasong administratibo sa isa’t isa kaugnay ng kanilang iringan matapos mabigo ang Supreme court na mapagkasundo ang dalawa.

Inireport ni Chief justice Hilario Davide sa lahat ng justices ang resulta ng naging pulong nila at sa isang 3-page resolution ay inutusan ng 15 justices ang dalawa na magsampa ng pormal na reklamo sa isa’t isa sa loob ng 48 oras.

Ang nasabing mga demanda ay isusumite naman sa oversight committee na pinamumunuan ni Senior Associate Justice Josue Bellosillo na siyang mag-iimbestiga kung mayroong matibay na ebidensiya para isulong ang reklamo ng mga ito laban sa isa’t isa.

Pormal ring ibinaba ni Justice Davide ang "gag" order kina Garchitorena at Badoy upang patuloy na pagbawalan ang mga ito na magsagawa ng anumang uri ng press conference o magpa-interview sa media hinggil sa naturang usapin.

Binalaan din ng Korte ang dalawang mahistrado na parurusahan kapag lumabag sa nasabing gag order.

Nabatid na tumanggi umano si Garchitorena na makipag-kamay kay Badoy sa apat na oras na miting na inayos ni Davide. (Ulat ni Grace Amargo)