America pedophile may VIP treatment - Loren

Inatasan ni Senate Majority Floor Leader Loren Legarda si Immigration Commissioner Andrea Domingo na tingnan ang napaulat na pagbibigay ng special treatment sa isang Amerikanong retiradong piloto na nakakulong sa Bureau of Immigration (BI) sa kasong multiple child sexual molestation.

Batay sa ulat na nakarating kay Legarda, binibigyan ng VIP treatment si Perry MacNeely na nakapiit ngayon sa Bicutan, Taguig.

"We were told that the suspect had allegedly managed to bribe jail guards who have allowed him to use teenage commercial sex workers in his cell," sumbong ni Legarda.

Ang 60-taong gulang na si MacNeely ay nakakagamit pa ng cellphone sa loob ng kanyang piitan at maliwanag na ebidensya ang litrato ng mismong tanggapan ng BI na hawak pa nito ang cellphone nang ito ay kuhanan ng larawan na inilathala sa pahayagan.

Sa kanyang pagkakaalam, mahigpit na ipinagbabawal ang sinumang nakapiit na magtaglay ng cellphone. (Ulat ni Rudy Andal)