ROTC bubuwagin ng Kongreso

Nagkaroon kahapon ng kakampi sa Kongreso ang mga estudyanteng tumututol sa pananatili ng Reserved Officers Training Corps (ROTC) matapos sabihin ni Palawan Rep. Vicente "Brown" Sandoval na gagawin niya ang lahat para mabuwag na ang kontrobersiyal na military training course.

Sinabi ni Sandoval na sa sandaling magbukas ang 12th Congress sa Hulyo 23 ay una niyang ipapanukala ang pagbuwag ng ROTC na labis umanong nagpapahirap sa mga estudyante sa kolehiyo.

Ipapalit umano sa ROTC ang isang programa na makakatulong sa pagpapalawak ng civic consciousness at patriotism ng mga kabataan.

Ipapanukala din niya na gagawin na lamang elective subject o extra curricular activity ang military training course para sa mga estudyante na nagnanais kumuha nito at nais maging miyembro ng militar pagkatapos ng graduation sa kolehiyo.

Hindi na umano bago ang mga reklamo laban sa ROTC at pinagmumulan lamang ito ng corruption at karahasan.

Sa halip umano na magandang asal ang ituro sa mga mag-aaral ay pagmamalupit sa kapwa at panunuhol ang kanilang natututunan. (Ulat ni Malou Rongalerios)