Gloria natakot, nakipag-dialogue sa civil society

Sa takot umanong mawala ang suporta ng civil society sa kanyang administrasyon, nakipagdayalogo kahapon si Pangulong Arroyo sa grupong Bayan, Bayan Muna, Akbayan, Anakbayan, Gabriela at Sanlakas para tiyakin sa mga ito na walang special treatment na ipinagkakaloob ang gobyerno hinggil sa isyu ng house arrest kay dating Pangulong Estrada.

Napagkasunduan sa pulong na magdaos ng regular na pakikipagkonsultasyon sa mga grupo minsan isang buwan para mapanatili ang komunikasyon.

Ang dialogue ay matapos magbanta ang civil society na kakalas ng suporta kay Arroyo dahil sa ipinapakita umano nitong pagkiling kay Estrada.

Nilinaw ng Pangulo na ang pananatili ni Estrada sa Veterans hospital ay bunga lang ng problema sa seguridad at kawanggawa bilang dating Presidente ng bansa. Pinag-usapan din sa pulong ang pagtataas ng presyo ng langis at iba pang isyu. (Ulat ni Lilia Tolentino)