Pinoy peacekeeping force ng UN yumao

Isang sundalong Pilipino na miyembro ng peacekeeping force ng United Nations sa East Timor ang namatay makaraang atakihin sa puso sa naturang dating kolonya ng Indonesia kamakalawa ng madaling-araw.

Kinilala ng mga awtoridad ang biktima na si Cpl. Edgar Gallego ng Philippine Army na takda sanang bumalik sa Pilipinas sa susunod na taon.

Bandang alas-4:00 ng madaling-araw nang bawian ng buhay si Gallego dahil sa cardio-pulmonary arrest sa Manatuto, East Timor.

Pansamantalang inilagak ang bangkay ng biktima sa UN Military Hospital sa Dili, Indonesia para sa kaukulang disposisyon. (Ulat ni Joy Cantos)