Undersecretary Mike Toledo papalit kay Press Secretary Puno

Maaaring pumalit kay Press Secretary Ricardo Puno kapag nagbitiw siya sa puwesto para kumandidatong senador sa susunod na taon ang undersecretary niyang si Mike Toledo.

Nilinaw ni Puno kahapon na wala pang katiyakan kung kailan siya magbibitiw kaya hindi totoo ang ulat na gagawin niya ito sa Disyembre 8. Ipinaliwanag niya na itinakda ng Commission on Elections sa Enero 2-14, 2001 ang petsa ng pagsusumite ng certificate of candidacy.

Isa pang miyembro ng Gabinete ni Pangulong Joseph Estrada ang maaaring mawala at ito si Foreign Affairs Secretary Domingo Siazon Jr.. Sinabi ng Pangulo na balak ikandidato ng Pilipinas si Siazon bilang Secretary General ng United Nations. (Ulat ni Lilia A. Tolentino)