Bodyguard ng mga kalaguyo ng Pangulo dinagdagan

Ibinunyag kahapon ni Batangas Congressman Ralph Recto na pinag-ibayo ng Presidential Security Group ang pagbabantay sa mga umano’y kalaguyo ni Pangulong Joseph Estrada.

Sinabi ni Recto na, ayon sa kanyang mapapanaligang mga impormante, dinagdagan ng PSG ang mga bodyguard ng mga babaeng kalaguyo ng Pangulo para mapangalagaan ang mga ito laban sa mga pangangantiyaw o pananakit ng mga puwersang kalaban ni Estrada.

Binanggit niya na, dati rati, ang First Family lang ang binabantayan ng PSG. Pero ngayon, kailangan ding bantayan ng PSG ang iba pang pamilya.

Pinuna ni Recto ang umano’y double standard ng Malacañang dahil pinalakas nito ang seguridad sa ibang mga babae ni Estrada samantalang binawi ang mga bodyguard ni Ilocos Sur Governor Luis "Chavit" Singson na nag-aakusang tumanggap umano ng payola mula sa jueteng ang Pangulo. (Ulat ni Jess Diaz)